PANALANGIN NG PAGHIHINTAY
PARA SA BAGONG OBISPO

Makapangyarihang Ama, ikaw ang Pastol na umaakay sa tanan.
Sa pamamagitan ng iyong Anak na si Hesus,
itinatag niya ang Simbahan sa ilalim ng pamamahala ng mga Apostol
at ng kanilang mga kahalili
upang akayin ang iyong bayan sa iyong pagliligtas.
Nagpapasalamat kami sa pagkakaloob mo sa amin
ng mga matatapat na pastol na namumuno at nangangalaga sa amin.
Ang kanilang paglilingkod sa amin ay katiyakan
na kaming iyong kawan ay patuloy mong nililingap at itinatangi.

Ngayong kami ay naghihintay sa iyong pagkakaloob
ng isang bagong lingkod-pastol,
itulot mong kami ay laging mamuhay sa katapatan sa iyong mga aral
at patuloy na umasa sa iyong kabutihan at pagmamahal.
Sa paghahanda namin ng aming mga sarili
sa pagdating ng kaloob mong punong taga-akay at tagapanguna,
ay papanibaguhin mo ang puso
ng aming mga kaparian at kaming iyong kawan,
upang sa pagdating ng iyong hinirang na punong pari,
kami ay makiisa sa kanyang hangarin
na patuloy na maitatag ang iyong paghahari dito sa lupa.
Ang lahat ng ito ay aming hinihiling sa pamamagitan ni Hesukristo,
kasama ng Espiritu Santo, magpasawalang-hanggan. Amen.

Nuestra Señora de los Dolores de Turumba, ipanalangin mo kami.
San Pablo Unang Ermitanyo, ipanalangin mo kami.
San Pedro Bautista, ipanalangin mo kami.